تحرر من قيودك وسافر ..أنشالله تسافر للبلد الي جمبك ..أتحرك سافر وانطلق ?
انا لفيت العالم كله من شرقه الي غربه من امريكا الي استراليا للبرازيل ومن روسيا الي منغوليا الي الهند ومن اليابان للصين ….ومن موريشيس لناميبيا الي كيب تاون زورت فينا وإسبانيا و كندا والدنمارك وإيطاليا وفرنسا ….وبلاد كتير ….عشت مغامرات شيقه واتعلمت حاجات كتير.
مره ركبت طيارة خاصة في أنجولا .. ✈️وسافرت درجه أولي لسويسرا ..
وعديت المحيطات.. …ركبت الجمال في مصر… والأفيال في تايلاند .. والتلفريك في ماليزيا …سوقت الريكشا في بنجلاديش وركبت القطر في الهند ..سافرت في يخت من هونج كونج لمكاو .. وايام تانية كان في انتظاري افخم ليموزين .
في الطائرة قابلت رؤساء دول وسياسين ومشاهير .وفنانين وعلماء ….
نمت ع الخشب في كوريا …وفي كابسولة في اليابان ..
ايام في سويت سبع نجوم وأيام في في كامب الشيخ موسي ..
..سافرت بنجلادش أفقر بلد في الدنيا وسافرت اغني الدول واقمت في غرفه بالريموت كنترول
نمت في خيمة جنب بركان في اندونيسيا ودخلت بيوت قبيلة المساى في كينيا وظفرت شعري أفريكاني زيهم .
اتفسحت في نيويورك وكاليفورنيا وتكساس ولوس انجلوس ودخلت ديزني ويونيفرسال .
اكلت الشطة في الهند وشربت الشاى في سريلانكا .. وجربت الجراد بالعسل في تايلاند والسوشي في اليابان .. وتذوقت الوافلز في بلجيكا والبطاطس في هولندا والستيك في امريكا والفواكه العجيبه في ماليزيا .. جربت رجلين الضفادع والحلزونة في فرنسا.
قريت في كتير من الديانات ودخلت معظم المعابد والكنائس والجوامع في العالم
شفت كل حاجة وعكسها
شفت الدول اللي بتتكلم عن احترام المرأة وبرضه شفتهم وهما عارضينها في الفاترينات في أمستردام .
شفت الدول التي تعشق العمل والنظام والكساله في افريقيا
كنت بقف امام عظمة ابداع الخالق في جمال الطبيعه الخلابه وامام البراكين والجبال والكهوف ..
شاهدت قدره العقل البشري في الاختراع في اوساكا باليابان .. ورحت المتاحف و شفت تاريخ المذابح في فيتنام والحروب الاهلية في كوريا .. وبكيت في متاحف اليابان امام بشاعه التدمير البشري في هيروشيما .
اتسرقت في فرنسا ومره لقيت اللي يساعدني ومره قفشت حرامي في ايطاليا .. ومره عزمتني أسره في منزلها في الكريسماس ..ومرة اتخانقت بالعربي مع سواق توك توك صيني في الصين .. شفت الدموع في عيون أسره سيلانيه من سريلانكا أتصاحبت عليهم 3 ايام ..
مره ضيعت الطريق في ميونخ وتوهت ونسيت اسم الفندق ومكانه والدنيا تلج …
ومره مشيت في عز الحر والرطوبه في شوارع الهند والصين ..
وشفت التكنولوجيا في اليابان والنظام في كوريا .. والشياكه والروقان في اوروبا .. شفت ناطحات السحاب في امريكا .. والقوانين العجيبة في سنغافورة .. والتاريخ في شوارع فرنسا
احتكيت بأهل الدول وكونت صداقات جميله معاهم
اتعلمت ان البشر متشابهيين جدا مهما اختلفو في الشكل واللون والاعتقاد ..
اتعلمت ان الثابت الوحيد في حياه الشعوب هي الاخلاق والإيمان الحقيقي مش الفهلوة والجهل وكيف قدرو يطورو نفسهم بالنظام واتقان العمل فهمت ان نفس الحاجة ممكن تتعمل بأكتر من طريقة ..
واكتشفت ان الخبرة مش بالسن, ولكنها بالمواقف والتجارب اللي عيشتها والناس اللي قابلتهم والقصص اللي سمعتها !!!
علشان كده انا اعشق السفر وعايزه أشجعك علي السفر
تحرر من القيود وسافر …انطلق ضع هدف لك كل عام انك تسافر اي بلد تحلم تزورها …صدقني لو سافرت حتحرر نفسك وتنطلق مافيش حاجه صعبه ولا مستحيلة …الصعب انك تقف مكانك متجربش متفكرش متحلمش …
د. سها عيد
أخصائية في علم طاقة المكان- فينج شوي